Demo image Demo image Demo image Demo image Demo image

شاه داغيم

شاه داغيم ،
چال پاپاغيم ،
ائل داياغيم ،
شانلی سهنديم
باشی طوفانلی سهنديم

باشدا حيدر بابا تک قارلا قيروولا قاريشيب سان
سون ايپک تئللی بولودلارلا افقده ساريشيب سان
ساواشارکن باريشيب سان
گويدن الهام آلالی سرری سماواته دئيه رسن
هله آغ کورکی بورون ، يازدا ياشيل دون دا گئيه رسن
قورادان حالوا يئيه رسن
دوشلرونده صونالار سينه سی تک شوخ ممه لرده
نه شيرين چشمه لرين وار
اوياشيل تئللری ، يئل هورمه ده آينالی سحرده
عشوه لی ائشمه لرين وار
قوی ياغيش ياغسادا يا غسين
سئل اولوب آخسادا آخسين
يانلاروندا دره لر وار
قوی قلمقاشلارين اوچسون فره لرله ، هامی باخسين
دوشلرونده هئره لروار
او اتک لرده نه قيزلار ياناغی لاله لرين وار
گول چيچکدن بزه ننده ، نه گلين لرکيمی نازين
يئل اسنده اوسولاردا نه درين راز نيازين
اوينايار گوللوقوتازين
تيتره يير ساز تئلی تک شاخه لرين چايدا چمنده
يئل او تئلرده گزه نده ، نه کوراوغلی چالی سازين
اورده گون خلوت ائديب گولده پری لرله چيمنده
قول قانادان اونا آغ حوله آچار غمزه لی قازين
قيش گئده ر ، قوی گله يازين
هله نوروز گلی وار ، قار چيچگين وار ، گله جکلر
سئل ، ياغيشدا يويونار کن ده گونش له گوله جکلر
اوزلرين تئز سيله جکلر
قيشدا کهليک هوسی له ، چوله قاچديقدا جوانلار
قاردا قاققيلدا ياراق نازلی قلمقاشلارين اولسون
ياز ، او دوشلرده ناهار منده سين آچديقدا چوبانلار
بوللی ، سودلی سورولر ، دادلی قاووتماشلارين اولسون
آد آليب سندن او شاعر کی ، سن اوندان آدآلارسان
اونا هر داد وئره سن يوز او مقابل داد آلارسان
تاريدان هر زاد آلارسان
آداش اولدوقدا ، سن اونلا ، داها آرتيق اوجالارسان
باش اوجالديقدا دماوند داغيندان باج آلارسان
شئر اليندن تاج آلارسان
اودا ، شعرين ، ادبين شاه داغيدير ، شانلی سهندی
اودا ، سيمرغ دن آلماقدادی فندی
شعر يازاندا قلميندن باخاسان در سپه لندی
سانکی اولدوزلار الندی
سوز دئينده گوروسن قاتدی گولی ، پسته نی ، قندی
ياشاسين شاعر افندی
اونه شاعر ، کی داغين وصفينه مصداق اونی گوردوم
من سنون تک اوجاليق مشقينه مشاق اونی گوردوم
عشقه ، عشق اهلينه مشتاق اونی گوردوم
اونه شاعر ، کی خيال مرکبينه شووشيغاياندا
او نهنگ آت آياغين توزلی بولودلاردا قوياندا
لوله لنمکده دی يئر - گوی نئجه طومار سارياندا
گوره جکسن او زماندا
نه زمان وارسا ، مکان وارسا کسيب بيچدی بير آندا
گئچه جکلر ، گله جکلر نه بوياندا ، نه اوياندا
نه بيليم قالدی هاياندا؟
باخ نه حرمت وار اونون ئوزدئميشی توک پاپاغيندا
شعرينين تاجی اگيلميش باشی دورموش قاباغيندا
باشينا ساوريلان اينجی ، چاريق اولموش آياغيندا
وحی دير شعری ، ملک لردی پيچيلدير قولاغيندا
شهدی وار بال دوداغيندا
اودا داغلار کيمی شانينده نه يازسام ياراشاندير
اودا ظالم قوپاران قارلا کولک له دوروشاندير
قودوزا ، ظالمه قارشی سينه گرميش ، ووروشاندير
قودوزون کورکنه ، ظالم بيره لر تک داراشاندير
آمما وجهينده فقير خلقی اگيلميش سوروشاندير
قارا ملتده هنر بولسا هنر له آراشاندير
قارالارلا قاريشاندير
ساريشاندير
گئجه حققين گوزودير ، طور تورتميش اوجاغيندا
اری ييب ياغ تک اورکلردی يانيرلار چيراغيندا
می ، محبتدن ايچيب لاله بيتيبدير ياناغيندا
او بير اوغلان کی ، پری لر سو ايچرلر چاناغيندا
اينجی قاينار بولاغيندا
طبعی بير سوگلی بولبول کی ، اوخور گول بوداغيندا
ساری سونبول قوجاغيندا
سولار افسانه دی سويله ر اونون افسونلی باغيندا
سحرين چنلی چاغيندا
شاعرين ذوقی ، نه افسونلی ، نه افسانه لی باغلار
آی نه باغلارکی ((الف ليلی )) ده افسانه ده باغلار
اودياخيب ، داغلاری داغلار
گول گولرسه بولاغ آغلار
شاعرين عالمی ئولمز ، اونا عالمده زوال يوخ
آرزيلار اوردا خاطرليه امکاندی ، محال يوخ
باغ جنت کيمی اوردا بو حرام دير بوحلال يوخ
اومحبتده ملال يوخ
اوردا حال دير داها قال يوخ
گئجه لر اوردا گوموشدندی ، قيزيلدان نه گونوزلر
نه زمرد کيمی باغلاردی ، نه مرمر کيمی دوزلر
نه ساری تئللی اينکلر ، نه آلا گوزلو ئوکوزلر
آی نئجه آی کيمی اوزلر؟
گول آغاجلاری نه طاوس کيمی چترين آچيب الوان
حلله کروانيدی چوللر ، بزه نر سورسه بو کروان
دوه کروانی دا داغلار ، يوکی اطلس دی بو حيوان
صابرين شهرينه دوغرو ، قاطاری چکمه ده سروان
او خياليمداکی شيروان
اور دا قاردا ياغار ، آمما داها گوللر سولا بيلمز
بو طبيعت ،او طراوتده محال دير اولا بيلمز
عومر پيمانه سی اوردا دولا بيلمز
او افقلرده باخارسان نه ده نيزلر ، نه بوغازلار
نه پريلر کيمی قوشلار قونوب ، اوچماقدا ن قاز لار
گولده چيممکده نه قيزلار
باليغ اولدوز کيمی گوللرده ، ده نيز لرده پاريلدار
آبشار مرواری سين سئل کيمی توکدوکده خاريلدار
يئل کوشولدار ، سو شاريلدار
شعرلر آذربايجانين غيرتلي اوغلي محمد حسين شهرياردان